ທຸດົງ 13 ຄວາມຫມາຍຂອງຄຳວ່າທຸດົງ
ທຸຕັງຄະກະຖາ(ວ່າດ້ວຍທຸດົງ)
ທຸດົງຄ໌ (ພາສາບາລີວ່າ ທຸຕັງຄະ )
ເປັນວັດປະຕິບັດທີ່ພຣະພຸດທະເຈົ້າຊົງອະນຸຍາດໄວ້
ບໍ່ມີການບັງຄັບ ແລ້ວແຕ່ຜູ້ໃດຈະສະໝັກໃຈປະຕິບັດຂັດເກົາ ເປັນອຸບາຍ ວິທີກຳຈັດຂັດເກົາກິເລສ
ເຮັດໃຫ້ເກິດຄວາມມັກນ້ອຍສັນໂດດ ຍິ່ງຂື້ນ ບໍ່ສະສົມ ໄປມາໃສກໍ່ສະດວກ ບໍມີພາລະຫຼາຍ
ຄືນົກທີ່ມີພຽງປີກກໍບິນໄປໄດ້ທົ່ວທິດ ບໍ່ແມ່ນເພື່ອສະສົມ ຫຼືລາບສັກກາລະ ແລະຊື່ສຽງ
ຖ້າຖືທຸດົງ ເພື່ອລາບສັກກາລະ ເພື່ອຊື່ສຽງ ປັບອາບັດທຸກກົດ (ຜິດວິນັຍ) .
ໂດຍຮູບສັບ : ທຸດົງແປວ່າ ອົງຄຸນເປັນເຄື່ອງກຳຈັດກິເລສ
ອົງຄຸນຂອງຜູ້ກຳຈັດກິເລສ
ຫຼືການສະມາທານປະຕິບັດເອົາເພື່ອກຳຈັດກິເລສ ທີ່ເປັນອັນຕະລາຍຕໍ່ການປະຕິບັດດີງາມ.
ຄວາມໝາຍ: ທຸດົງ ຄືຂໍ້ວັດປະຕິບັດ
ຫຼືແນວທາງປະຕິບັດຈຳນວນ 13 ຂໍ້ ທີ່ພຣະພຸດທະເຈົ້້າໄດ້ອະນຸຍາດໄວ້ໃຫ້ແກ່ພຣະສົງ
ເພື່ອເລືອກນຳໄປປະຕິບັດເພິ່ມເຕີມຂອງພຣະສົງ ອົງໃດຫນື່ງທີ່ສະໝັກໃຈສະມາທານເອົາ ເພື່ອນຳໄປປະຕິບັດຂັດເກົາໃຫ້ເປັນຜູ້ມັກນ້ອຍສັນໂດດ
ເພື່ອກຳຈັດກິເລສ ທຸດົງນັ້ນເປັນພຽງຂໍ້ປະຕິບັດ ຫຼືແນວທາງໃນການປະຕິບັດ
ທີ່ໃຫ້ເລືອກປະຕິບັດຕາມໃຈ ບໍ່ແມ່ນສິນຂອງພຣະສົງ ຜູ້ໃດຈະປະຕິບັດຂໍ້ໃດຫນຶ່ງ
ຫຼືບໍ່ປະຕິບັດກໍ່ຂື້ນຢູ່ກັບຄວາມສະໝັກໃຈ.
ແຕ່ປະຈຸບັນສັງຄົມຊາວພຸດ
ເມື່ອເຫັນພຣະແບກບາດ ແບກກົດອອກຈາກວັດ ຫຼື ໄປໃນປ່າໃນດົງກໍ່ວ່າເປັນພຣະທຸດົງ ຫຼື
ພຣະເອງກໍ່ຕາມບໍ່ຮູ້ຮອດວ່າທຸດົງແປວ່າຫຍັງ ແຕ່ບອກວ່າຕົວເອງໄປທຸດົງ ຫຼືວ່າເດີນດົງ
ເດີນປ່າຕາມຄວາມໝາບພາສາລາວເຮົາ ແຕ່ການອອກເດີນທາງໄປ ບໍ່ຢູ່ກັບທີ່
ຫລືໄຈາລິກໄປໃນທີ່ຕ່າງ ໆ ບໍ່ຢູ່ບ່ອນເກົ່າ ເພິ້ນເອີ້ວ່າ : ໂມເນຍຍະປະຕິບັດ
ຄືການບໍ່ຢູ່ໃນທີ່ເດີມ ຊໍ້າ ບໍ່ບິນບາດໃນທີ່ເດີມຊໍ້າ ບໍ່ນອນໃນທີ່ເດີມຊໍ້າ
ເພື່ອບໍ່ໄປຕັດສິນວ່າໃຜດີ ໃຜຊົ່ວ
ບ່ອນນັ້ນດີ ບ່ອນນີ້ຊົ່ວເປັນຕົ້ນ.
ທຸດົງທີ່ພຣະພຸດທະເຈົ້າຊົງອະນຸຍາດ ມີ 13
ຂໍ້ສະມາທານ ແລະ 13 ຂໍ້ລະເວັ້ນມີດັ່ງນີ້:
1,
ປັງສຸກູລິກັງຄະ: ລະເວັ້ນບໍ່ໃຊ້ຜ້າທີ່ປານີດຈົບງາມ ເໝືອນຄະຫະບໍດີໃຊ້.
ສະມາທານໃຊ້ແຕ່ຜ້າບັງສະກຸນທີ່ເຂົາຖິ້ມແລ້ວ.
2,
ເຕຈີວະຮິຕັງຄະ: ລະເວັ້ນການມີຜ້າໃນຄອບຄອງ ແລະນໍາໃຊ້ຜ້າເກີນ 3 ຜືນ ສະມາທານໃຊ້ຜ້າພຽງ
3 ຜືນ.
3,
ປິນດະປາຕິກັງຄະ: ລະເວັ້ນຮັບອະຕິເລກລາບ(ຄືບໍ່ຮັບນິມົນໄປສູດ ໄປສັນ)
ສະມາທານເອົາແຕ່ທ່ຽວບິນທະບາດເປັນປະຈຳ.
4,
ສະປະທານະຈາຣິກັງຄະ : ລະເວັ້ນການຍຶດຕິດທ່ຽວພິກຂາຈານ(ບິນທະບາດ)
ເພື່ອບໍ່ໃຫ້ຜູກພັນກັບຍາດໂຍມ. ສະມາທານບິນທະບາດຕາມລຳດັບບໍ່ເລືອກບ່ອນທີ່ຈະບິນທະບາດ ເດີນບິນທະບາດຕາມລຳດັບ.
5,
ເອກາສະນິກັງຄະ: ລະເວັ້ນອາສະນະທີສອງ, ສະມາທານອາສະນະດຽວ(ສັນເຂົ້້າຄາບດຽວ) ບູຮານວ່າ:
ສັນເອກາ .
6,
ປັຕຕະບິນດິກັງຄະ: ລະເວັ້ນສັນພາຊະນະທີສອງ ໃສ່ອາຫານລວມໃນພາຊະນະດຽວກັນທັງໝົດ,
ສະມາທານສັນໃນບາດ.
7,
ຂະລຸປັສສາພັຕຕິກັງຂາ: ລະເວັ້ນການຮັບປະທານອາຫານເຫຼືອ,
ສະມາທານເມື່ອເລີ່ມລົງມືສັນແລ້ວບໍຍອມຮັບເພິ່ມ.
8,
ອາຮັນຍິກັງຄະ: ລະເວັ້ນການຢູ່ເສນາສະນະໃກ້ບ້ານ, ສະມາທານການຢູ່ໃນປ່າໄກອອກໄປ 500
ຊົ່ວຂາທະນູ ຫຼື ປະມານ 1 ກິໂລແມັດ, ໂດຍນັບລາຕີຢູ່ທີ່ປ່າຕະຫຼອດ.
9,
ລຸກຂະມູລິກັງຄະ: ລະເວັ້ນການນອນທີ່ມຸງທີ່ບັງ(ເຊັ່ນ ກຸດຕິ ຖໍ້າ ເຮືອນ),
ສະມາທານຢູ່ໂຄນຕົ້ນໄມ້ແຕ່ອະນຸຍາດໃຫ້ເຮັດຊຸ້ມຜ້າຈີວອນ, ຫຼືຍຸກປະຈຸບັນໃຊ້ກົດກໍໄດ້.
10,
ອັພໂພກາສີກັງຄະ: ລະເວັ້ນການເຂົ້າຮົ່ມທຸກຊະນິດ, ສະມາທານຢູ່ກາງແຈ້ງ ບໍ່ຢູ່ກ້ອງຮົ່ມໃດ
ໆ
11,
ໂສສານິກັງຄະ: ລະເວັ້ນການຢູ່ສະຖານທີ່ພຸກຜ່ານ ເນືອງນັນ,
ສະມາທານຢູ່ສະຖານທີ່ປ່ຽວ,ປ່າຊ້າ
12,
ຍະຖາສັນຖະຕິກັງຄະ: ລະເວັ້ນການຍຶດຕິດໃນເສນາສະນະ, ສະມາທາຢູ່ຕາມມີຕາມໄດ້
ເພິ່ນຈັດໃຫ້ແນວໃດກໍ່ພໍໃຈຢູ່ຢ່າງນັ້ນ.
13,
ເນສັດຊິກັງຄະ: ລະເວັ້ນການນອນ, ສະມາທານຖືອະຣິຍະບົດ 3 ຄືນັ່ງ, ຢືນ, ຍ່າງ ເທົ່ານັ້ນ.
ວັດປະຕິບັດກ່ຽວກັບທຸດົງແບ່ງເປັນ
3 ໝວດຄື:
1,
ໝວດວ່າດ້ວຍ ຈີວະຣະປະຕິສັງຍຸດ ວ່າດ້ວຍຈີວອນ ມີ 2 ວັດຄື:
ຖືຜ້າບັງສະກຸນເປັນວັດ1, ຖືຜ້າ 3 ຜືນຄື:ໄຕຣຈີວອນເປັນວັດ1.
2,ໝວດວ່າດ້ວຍປິນດະປາຕະປະຕິສັງຍຸດ
ກ່ຽວກັບບິນດະບາດມີ 5 ວັດຄື:
ຖືບິນດະບາດເປັນວັດ
ຄືສັນສະເພາະບິນດະບາດຢ່າງດຽວ1, ຖືການບິນດະບາດຕາມລຳດັບເປັນວັດ
ຄືບໍ່ເລືອກທີ່ຮັກມັກທີ່ຊັງ,ບໍ່ວ່າເຮືອນຄົນຈົນ ຄົນມີຮັບໝົດ1,
ຖືການສັນໃນອາສະນະດຽວເປັນວັດ ຄືສັນເຂົ້າຄາບດຽວ ສັນເອກາ1, ຖືການສັນໃນບາດເປັນວັດ
ບໍ່ໃສ່ພາຊະນະອື່ນສັນນອກຈາກບາດ1, ຖືການຫ້າມພັດທີ່ຖວາຍຕາມຫຼັງເປັນວັດ
ຄືຮັບອາຫານມາພໍແລ້ວເທົ່າໃດກໍ່ສັນເທົ່ານັ້ນອິ່ມບໍ່ອິ່ມກໍ່ບໍ່ຮັບອີກ1,
3,ໝວດວ່າດ້ວຍ
ເສນາສະນະປະຕິສັງຍຸດ ກ່ຽວກັບເສນາສະນະມີ 6 ວັດຄື:
ຖືການຢູ່ປ່າເປັນວັດ
ຄືການຢູ່ໃນປ່າເທົ່ານັ້ນເປັນວັດ1, ຖືການຢູ່ໂຄນຕົ້ນໄມ້ ຄືການຢູ່ກ້ອງຕົ້ນໄມ້ເປັນວັດ1,
ຖືການຢູ່ກາງແຈ້ງເປັນວັດ ຄືການຢູ່ແຕ່ກາງແຈ້ງເປັນວັດເທົ່ານັ້ນ1, ຖືການຢູ່ໃນປ່າຊ້າເປັນວັດ1,
ຖືການຢູ່ໃນເສນາສະນະທີ່ເຂົາຈັດໃຫ້ເທົ່ານັ້ນເປັນວັດ1, ຖືການນັ່ງເປັນວັດ
ຄືບໍ່ນອນເປັນວັດ1,
ພຣະພິກຂຸຜູ້ມຸ່ງຫວັງຄວາມບໍລິສຸດ ມຸ່ງຫວັງກຳຈັດຂັດເກົາກິເລສ
ອັນເປັນສິ່ງທີ່ເຮັດໃຫ້ເສົ້າ ໝອງ
ປາຖະໜາຄວາມພຽນ ມຸ່ງຫວັງຄວາມຫລຸດພົ້ນ ນອກຈາກປະຕິບັດຕາມໃນປາຣິສຸດທິສິນ4 ຄື:
ສັງລວມໃນປະຕິໂມກ,
ສັງລວມອິນຊີ, ລ້ຽງຊີວິດບໍຣິສຸດ, ພິຈາລະນາປັດໄຈ 4 , ສຶກສາຕາມໄຕຣສິກຂາ ມີສິນ ສະມາທິ
ປັນຍາແລ້ວ ຈະປະຕິບັດໃຫ້ເຂັ້ມຂຸ້ນຂື້ນອີກເພິ່ງສະມາທານເອົາທຸຕັງຄະວັດ 13 ຂໍ້
ຂໍ້ໃດຫນຶ່ງ ຫລື ພ້ອມກັນຫລາຍຂໍ້ກໍ່ແລ້ວແຕ່ສັດທາ ແລະກໍາລັງທີ່ຈະປະຕິບັດໄດ້
ຄຳສະມາທານທຸດົງ
13 ຂໍ້:
1,
ຖືຜ້າບັງສະກຸນເປັນວັດສະມາທານວ່າ:
ຄະຫະປະຕິຈີວະຣັງ ປະຕິກຂິປາມິ ປັງສຸກູຣິກັງຄັງ ສະມາທິຍາມິຯ
2,
ຖືຜ້າໄຕຣຈີວອນເປັນວັດສະມາທານວ່າ:
ຈະຕຸຕຖະຈີວະຣັງ
ປະຕິກຂິປາມິ ເຕຈີວະຣິກັງຄັງ ສະມາທິຍາມິຯ
3,
ຖືທ່ຽວບິນທະບາດເປັນວັດສະມາທານວ່າ:
ອະຕິເລກະລາພັງ
ປະຕິກຂິປາມິ ປິນດະປາຕິກັງຄັງ ສະມາທິຍາມິຯ
4,
ຖືທ່ຽວບິນທະບາດໄປຕາມລໍາດັບເປັນວັດສະມາທານວ່າ:
ໂລລຸປປະຈາຣັງ
ປະຕິກຂິປາມິ ສະປະທານະຈາຣິກັງຄັງ ສະມາທິຍາມິຯ
5,
ຖືນັ່ງສັນອາສະນະດຽວເປັນວັດສະມາທານວ່າ:
ນານາສະນະໂພຊະນັງ
ປະຕິກຂິປາມິ ເອກາສະນິກັງຄັງ ສະມາທິຍາມິຯ
6,
ຖືສັນສະເພາະໃນບາດເປັນວັດສະມາທານວ່າ:
ທຸຕິຍະພາຊະນັງ
ປະຕິກຂິປາມິ ປັຕຕະບິນດິກັງຄັງ ສະມາທິຍາມິຯ
7,
ຖືຫ້າມພັດອັນນໍາມາຖວາຍ ທີຫຼັງສະມາທານວ່າ:
ອະຕິຣິຕຕະໂພຊະນັງ
ປະຕິກຂິປາມິ ຂະຣຸປັຈສາພັຕຕິກັງຄັງ ສະມາທິຍາມິຯ
8,
ຖືຢູ່ປ່າເປັນວັດສະມາທານວ່າ:
ຄາມັນຕະເສນາສະນັງ
ປະຕິກຂິປາມິ ອາຣັນຍິກັງຄັງ ສະມາທິຍາມິຯ
9,
ຖືຢູ່ໂຄນຕົ້້ນໄມ້ເປັນວັດສະມາທານວ່າ: ສັນນັງ ປະຕິກຂິປາມິ ຣຸກຂະມູນຣິກັງຄັງ
ສະມາທິຍາມິຯ
10,
ຖືຢູ່ກາງແຈ້ງເປັນວັດສະມາທານວ່າ:
ສັນນັນຈະ
ຣຸກຂະມູລັນຈະ ປະຕິກຂິປາມິ ອັພໂພກາສິກັງຄັງ ສະມາທິຍາມິຯ
11,
ຖືຢູ່ປ່າຊ້າເປັນວັດສະມາທານວ່າ: ອະສຸສານັງ ປະຕິກຂິປາມິ ໂສສານິກັງຄັງ ສະມາທິຍາມິຯ
12,
ຖືການຢູ່ເສນາສະທີ່ເພິ່ນຈັດໃຫ້ເຊັ່ນໃດກໍພໍໃຈເຊັ່ນນັ້ນສະມາທານວ່າ:
ເສນາສະນະໂລລຸປປັງ ປະຕິກຂິປາມິ ຍະຖາສັນຖະຕິກັງຄັງ ສະມາທິຍາມິຯ
13,
ຖືການນັ່ງເປັນວັດສະມາທານວ່າ: ເສຍຍັງ ປະຕິກຂິປາມິ ເນສັຊຊິກັງຄັງ ສະມາທິຍາມິຯ
ພຣະອະຣິຍະບຸຄຄົນໃນສະໄຫມພຸດທະການທີ່ມີຄວາມສຳຄັນໃນການຖືທຸດົງມີຄື:
ພຣະມະຫາກັສສະປະ ຖືຜ້າບັງສະກຸນ ຢູ່ປ່າ ບິນທະບາດເປັນວັດ,
ພຣະນາລະກະ ຖືບິນທະບາດຕາມລຳດັບ ຢູ່ໃນເສນາສະນະເພິ່ນຈັດໃຫ້ເປັນວັດ, ພຣະໂມຄະຣາດ
ຖືຜ້າບັງສະກຸນເປັນວັດ, ພຣະຈັກຂຸບານ ຖືການບໍ່ນອນເປັນວັດ, ພຣະມະຫາກາລ ຖືຢູ່ປ່າຊ້າເປັນວັດ
ເປັນຕົ້ນຯ
ความคิดเห็น
แสดงความคิดเห็น