ສິມນ້ຳ
ສີມາ(ສິມ)
ສີມາຫຼືສິມຫມາຍເຖິງ ຂອບເຂດ ແດນ ທີ່ສົງຂອດ ຫຼືກຳໜົດຂື້ນແລ້ວ ໄວ້ສຳຫລັບກະທັມສັງຄະກັມຂອງພຣະສົງ.
ຊະນິດຂອງສີມາ
1,ພັດທະສີມາ:
ຄື ເຂດ ແດນທີ່ສົງກຳຫນົດຂື້ນເອງ ຫຼືຂອດແລ້ວ ຕັ້ງຢູ່ເທິງແຜ່ນດິນໃຊ້ສິ່ງຕ່າງ ໆ
ເປັນນິມິດຫຼືເຄື່ອງໝາຍ ເຊັ່ນ: ຕົ້ນໄມ້, ພູເຂົາ, ແມ່ນໍ້າ, ຈູມປວກ, ສີລາ ຫຼືຫີນ ເປັນຕົ້ນ ສ່ວນຫຼາຍໃຊ້ຫີນເປັນກ້ອນ
ກົມມົນ ເປັນທ່ອນຍາວ ເພາະໝັ້ນຄົງຖາວອນກວ່າຢ່າງອື່ນ
ແລະນິຍົມຝັງໄວ້ໃຫ້ເຫັນເປັນຫລັກນິມິດແນ່ນອນ ຈະເຫັນໄດ້ຈາກສິມເກົ່າ ໆ ຫລາຍວັດ ສ່ວນການເຮັດເປັນໜ່ວຍມົນ ໆ
ແລະມີການຕັດຫວາຍລູກນິມິດນີ້ເປັນວັດທະນະທັມເກິດຂື້ນມາໃຫມ່ ຈາກອິດທິພົນຂອງບ່ອນອື່ນ.
2,ອະພັດທະສີມມາ:
ໄດ້ແກ່ເຂດຊຸມຊົນທີ່ສົງບໍ່ໄດ້ກຳໜົດຂື້ນເອງ
ຫລືບໍ່ໄດ້ຂອດເທື່ອ ແຕ່ຖືເອົາເຂດທີ່ກຳໜົດໄວ້ຕາມປົກກະຕິຂອງບ້ານເມືອງ ອາດຈະເປັນບ້ານ
ຕາແສງ ເມືອງ ປະເທດ ເປັນຕົ້ນ.
3,ວິສຸງຄາມສີມາ:
ຄືອານາເຂດ ຫຼື ບໍລິເວນສ່ວນຫນຶ່ງພາຍໃນວັດ ມີເຈົ້າມະຫາຊີວິດ
ຫຼືທາຍົກຜູ້ປະກອບດ້ວຍສັດທາແກ່ກ້າ ມອບຖວາຍໃຫ້ແກ່ສົງ
ປະຈຸບັນແມ່ນນາຍົກລົດຖະມຸນຕີເປັນຜູ້ອະນຸຍາດ ການສ້າງສິມຕ້ອງຢູ່ໃນຂອບເຂດທີ່ອະນຸຍາດ
ແລະການຝັງລູກນິມິດຮອບອຸໂປສົດ ຕ້ອງຢູ່ໃນເຂດຂອງ ວິສຸງຄາມສີມາເທົ່ານັ້ນ.
ຂະໜາດຂອງສີມາ:
ມີພຣະບໍລົມພຸດທາຍຸຍາດໃຫ້ສົງກຳໜົດຂະໜາດສີມາຕາມຄວາມຈຳເປັນ
ບໍ່ໃຫ້ນ້ອຍ ຫຼືໃຫຍ່ເກີນໄປ ຂະໜາດນ້ອຍໃຫ້ພຣະສົົງນັ່ງຫັດຖະບາດ(ນັ່ງຕົວກົງ ຢື້ແຂນອອກໄປຈັບອີກຄົນໜຶ່ງໄດ້ ຮອບຕົວ) ໄດ້ບໍ່ຕໍ່າກວ່າ ໒໑ ອົງ ເພາະການເຮັດສັງຄະກຳບາງຢ່າງຕ້ອງໃຊ້ພຣະສົງ ໒໑ ຂື້ນໄປ
ເຊັ່ນ ການຂໍອັບພານ ອອກຈາກອາບັດສັງຄາທິເສດເປັນຕົ້ນ. ຂະໜາດໃຫຍ່ບໍ່ໃຫ້ເກີນ ໓ ໂຍດ (ໂຍດຫນື່ງ
ເທົ່າກັບ ໑໖ ກິໂລແມັດ)
ສີມນໍ້າ (ສີມາກາງນໍ້າ) ອຸທະກະສີມາ ຫຼື ອຸທະກຸກເຂປະສີມາ) ເປັນສີມາທີ່ກຳໜົດເຂດຂື້ນໃນນ້ໍາ ຈັດເປັນອະພັດທະສີມາ ຊະນິດຫນຶ່ງ
ແບ່ງຕາມລັກສະນະຂອງນ້ຳທີ່ກຳໜົດຂື້ນເປັນ ອຸທະກະສີມາ ໄດ້ດັ່ງນີ້:
ນະທີສີມາ :
ຄືເຂດແດນທີ່ສົງກຳໜົດເທິງແມ່ນ້ຳ ທີ່ມີນ້ຳໄຫຼຢູ່ຕະຫຼອດເວລາ ບໍ່ໄດ້ຕັນ
ບໍ່ໄດ້ແຫ້ງ ເຊັ່ນນ້ຳຂອງເປັນຕົ້ນ.
ສະມຸດທະສີມາ:
ຄືເຂດແດນໃນທະເລມະຫາສະຫມຸດ ການກຳຫນົດເຂດເລີ່ມຕົ້ນຂອງສີມາ ໃຫ້ກຳຫນົດຝັ່ງນ້ຳ
ທີ່ນ້ຳລົງທີ່ສຸດ.
ຊາຕະສະສີມາ: ຕ້ອງເປັນສະ
ເປັນໜອງທີ່ເກິດຂື້ນຕາມທໍາມະຊາດ ບໍ່ແມ່ນໃຜຜູ້ໃດຜູ້ຫນຶ່ງມາຂຸດໄວ້
ເຕັມໄປດ້ວຍນ້ຳທີ່ມາໄດ້ຮອບດ້ານ ມີນ້ຳພໍໃຊ້ຢູ່ສະເໝີ.
ໄລຍະຫ່າງຈາກຝັ່ງຂອງສີມາ: ອຸທະກະສີມາ ຫຼືສີມານ້ຳຕ້ອງມີໄລຍະຫ່າງຈາກຝັ່ງ
ປະມານບູລຸດຜູ້ມີກຳລັງແຮງວັກນ້ຳໃສ່ບໍ່ເຖິງ ສີມານັ້ນໂດຍຮອບ ສຳຫຼັບສະຖານທີ່ນັ້ນ
ຈະໃຊ້ເຮືອກໍ່ໄດ້ ແພກໍ່ໄດ້ ເຊິ່ງຈະຕ້ອງມັດສະໝໍ ຫຼືມັດໄວ້ກັບຫລັກກາງນ້ຳ
ຫຼືຕົ້ນໄມ້ທີ່ເກິດກາງນ້ຳນັ້ນກໍ່ໄດ້ ແຕ່ຫ້າມມັດເຮືອ ຫລືແພໄວ້ກັບຕົ້ນໄມ້
ງ່າໄມ້ທີ່ເກິດຢູ່ເທິງຝັ່ງ, ຈະເຮັດຮາວ ຫຼືຂັ້ນໄດກ່າຍໄປຫາເຮືອ ຫຼືແພກໍ່ໄດ້
ແຕ່ເວລາສູດສັງຄະກັມໃຫ້ປົດອອກ ບໍ່ໃຫ້ພາດ ກັບເຮືອ ແພໄດ້ ຈະໃຊ້ເຮືອທີ່ເຄື່ອນທີ່ໄປມາທັມສັງຄະກັມບໍ່ໄດ້.
ຄວາມແຕກຕ່າງລະຫວ່າງອຸທະກະສີມາ ແລະພັດທະສີມາ:
ອຸທະກະສີມາ
ຫຼື ສີມາກາງນ້ຳ
ມັກຈະເປັນສີມາທີ່ສົມມຸດກັນຂື້ນມາສະເພາະກິດໃນການທັມສັງຄະກັມແຕ່ລະຄັ້ງ
ເມື່ອຈະທັມສັງຄະກັມຄັ້ງໜຶ່ງ ກໍ່ກະທັມພິທີກັມເທື່ອໜຶ່ງ
ກໍ່ເຮັດພິທີສູດສົມມຸດສີມາຄັ້ງໜຶ່ງ ໂດຍກຳຫນົດເອົາເວລາທີ່ສົງ
ນັ່ງຫັດຖະບາດຢູ່ເທົ່ານັ້ນ ພໍລຸກຈາກບ່ອນ ຫຼືລະຫັດຖະບາດ
ກໍ່ເປັນອັນວ່າຫມົດເຂດສີມານັ້ນ ຈະໃຊ້ໃຫມ່ກໍ່ຕ້ອງສົມມຸດຂື້ນໃຫມ່ ໃນການສົມມຸດອຸທະກະສີມາແຕ່ລະຄັ້ງບໍ່ຕ້ອງສູດຖອນ
ເພາະຖືວ່າເປັນສະຖານທີ່ບໍລິສຸດຢູ່ແລ້ວ ແມ່ນວ່າເຄີຍເຮັດສົມມຸດ ອຸທະກະສີມາ ໃນສະຖານບ່ອນນັ້ນມາແລ້ວກໍ່ຕາມ
ຖືວ່າອາຍຸ ອຸທະກະສີມານັ້ນຫມົດໄປແລ້ວ ກາຍເປັນແມ່ນ້ຳ ມະຫາສະຫມຸດ
ຫນອງບຶງຕາມທຳມະຊາດໄປແລ້ວ ໃນສະໄຫມບູຮານ ເພິ່ນນິຍົມສົມມຸດ ອຸທະກະສີມາ
ທັມສັງຄະກຳບວດນາກ ເພາະຖືວ່າເປັນສີມາບໍລິສຸດກວ່າ ພັດທະສີມາ(ສິມບົກ) ເພາະວ່າຕ້ອງໄດ້ສູດຖອນເສຍກ່ອນ ຢ້ານວ່າສະຖານທີ່ນັ້ນເປັນບໍລິເວນສີມາທີ່ຖືກສົມມຸດມາກ່ອນ
ຈະເຮັດໃຫ້ສີມາທີ່ສົມຂື້ນມານັ້ນໃຊ້ບໍ່ໄດ້ ເປັນສີມາ ສັງກະ (ສີມາເຕັງກັນ) ຖືວ່າເປັນສີມາວິບັດ ໃຊ້ເຮັດສັງຄະກຳບໍ່ໄດ້ .
ໃນສະໄໝບູຮານຄົນລາວນິຍົມສົມມຸດ
ອຸທະກະສີມາ(ສິມນ້ຳ) ເຮັດສັງຄະກັມທີ່ສຳຄັນເຊັ່ນ: ຕອນເອົາພຣະບາງຂື້ນມາຮອດກຸງຈັນທະບູລີ ສີສັດຕະນາກ
ກໍ່ເຮັດສິມນ້ຳສົມໂພດຢູ່ຫາດດອນຈັນ ຫລື ປະຫວັດຍາຄູຂີ້ຫອມ
ທີ່ເປັນພຣະອະຣິສົງລາວສະໄຫມບູຮານ ກໍ່ມີການຂອດສິມນ້ຳບວດຢູ່ຫາດດອນຈັນເຊັ່ນດຽວກັນ.
ປະຈຸບັນສີມນ້ຳ
ບໍ່ນິຍົມຂອດກັນແລ້ວ ເພາະເປັນການຫຍຸ້ງຍາກ ແລະຜູ້ທີ່ເຂົ້າໃນການທຳສັງຄະກຳເລື່ອງນີ້ກໍຫາຍາກ
ແຕ່ກໍ່ພໍມີຫລັກຖານໃຫ້ເຫັນຢູ່ ເຊັ່ນທາງເມືອງເງິນ ເມືອງຊຽງຮ່ອນແຂວງໄຊຍະບູລີ
ແລະຍຸກສະໄຫມນີ້ຫລາຍວັດກໍນິຍົມ ສ້າງວິສຸງຄາມະສີມາ(ສິມບົກ) ທີ່ໄດ້ຮັບການອະນຸຍາດສ້າງຈາກຝ່າຍບ້ານເມືອງໂດຍທ່ານາຍົກລັດຖະມຸນຕີເປັນຜູ້ອະນຸຍາດຂອດ.
ບົວສະຖະກາງນ້ຳວັດບ້ານຂອນ ເມືອງເງິນ ແຂວງໄຊຍະບູລີ
ບົວສະຖະກາງນໍ້າວັດນາໂງ ເມືອງເງິນ ແຂວງໄຊຍະບູລີ
ความคิดเห็น
แสดงความคิดเห็น